Saturday, February 16, 2008

نهاية حكاية خادمتي , الله يساعدني

الثأر اي التار و اه من التار
اي عار اللي يتغسل بدم الغير ؟؟
و اي فوضى ممكن تعم في مكان
لو كل واحد فيه بياخذ حقه بإيديه ؟

نعم ان القصاص حق
لكن اقامة الحد دون الرجوع للحاكم او القضاء هو فوضى كبيرة
لانه بالشكل دة يسبب في انتشار القتل بين الناس
و يظل هؤلاء في دائرة مغلقه و يروح ضحيتها ارواح بريئة لا ذنب لها ؟

و لكن اللي حصل في قصتنا غير

ويمكن السبب ان اهل الطرف الثاني مش صعايده؟
فلم ياخذوا الامر بمحمل الجديه
والا كانت حتبقى مشكلة تانية ؟

و نكمل الحكاية ....

لما عرف اعمام الشاب و خلانه انه مات مقتول بسم دسه له صاحبة المقرب؟
ما همدوش و بدوا في التحضير للاخذ بثار اخوهم المقتول
استمر العزاء 3 ايام و انصرف المعزيين
جزء منهم سافر البلد بعد عمل الواجب
والجزء الثاني اقام عند اخت القتيل
اللي هى تبقى ام خادمتي منال

في الاثناء دي ابتعد اخو المقتول و امه و كل اسرته عن القاتل و تجنبوه
والغرض في رايي انهم يهدوا الامور الى حين تحضير المطلوب !
بعد كم شهر و فوات الاربعين بدأت اخت القتيل تتقرب من القاتل
و بدات في الحديث معه اولا في الشارع
وتقوله "
خلاص اللي راح راح و الحي ابقى من اللي مات فطيس ؟"
فضلت تطمئن الواد القاتل انها
و اسرتها نسوا اللى حصل و تعالى يا حبيبي نفتح صفحة جديدة
والواد الاهبل صدق و هو لا يعرف انه حيفتح صفحة النهاية ؟

كان في الفترة دي الواد القاتل اتزوج
ومراته كمان كانت حامل
وطبعا مثل
بيوت كثير لا يعمر فيها السعادة الا شهر او اثنين
بدات المشاكل تدب بين القاتل و مراته

والواد يا حرام محتاج حد يستشيره و يساعد؟
فملقاش بسلامته غير اخت المقتول صاحبة يذهب لها و يفضفض ببلاوي مراته ؟
استقبلته طبعا هى بصدر رحب و بقلبها الكبير
و بقت هى كمان تفضفض معاه و تشتكي من زوجها المنيل على عنيه
اللي ادعت انه كل شوية يتخانق معها
ويا حبيبي للاسف مافيش حد مرتاح في الدنيا دة ؟

و الواد وثق فيها اكثر ما هو شايف احلى معاملة
و من مين ؟؟ من اهل القتيل ؟؟ " صحبه "
و فضلت على هذا الحال تدعوه دايما لزيارتها
والا ينقطع ابدا عنها
والواد يروح و يجلس بالساعة و الاثنين و هو مرتاح و هني البال و العين ؟

لحد ما تم حوالي السنتين

ووثق فيها اكثر و اكثر لحد ما بقى يتكلم معاها عن مشكلته الجنسية اللي بيعاني منها؟وانه مش عارف يعمل ايه؟
وهى كانت حريصة انه لما يدخل بيتها لا يكون اي حد من اولادها خاصة البنات حاضر في الجلسات ديه
وكانت تدخلهم الغرف و تؤمرهم انها مش عايزة تشوف خيال واحدة منهم
والواد يزور و يخلص زيارة و البيت كانة فاضي؟
وهو لا يعرف ان الغرف مش بس فيها البنات

لا و فيها كمان اعمام
و اخوال الواد المقتول

بتتابع من خلف الابواب مسار الخطة و تنفيذها و اللي بتقوم به و باتقان الست ام منال !!
لحد ما جتلها الاشارة بالهجوم بعد سنتين من المحلسه
كان وقتها مراته ولدت و كمان العيل بقى عنده سنة و نصف تقريبا
.
.

وكانت لحظة التنفيذ
ومااخدش الواد في ايديها غلوتين ( قصدي يومين اثنين )
جاء يزورها فبشرته بالفرج انها لقت واحدة صالحة و تقيه بتعمل وصفات لعلاج نفس الحالة ديه
وانها قالت لها انها عندها شاب صغير يهمها مصلحته و عايز علاج عشان يرجع لحالته الطبيعية
فاعطتها الست تحويجه فيها الشفا و العافية
و قالت له دي قالت لي تحط التحويجة على اي شىء و تاكله يعني مثلا ممكن علبة زبادي
و ندت على بنتها الوسطانية
" روحي هاتي يا بت زبدية عشان ياكل اخونا بالف صحة و عافية
وحطت له التحويجة و اعطته الزبدية والواد اكلها و هو لا يعرف ان التحويجة هى
.
.
.
.

سم فئران

اشترته ام منال من الصيدلية !!
و اكلها الغشيم كلها و فضلت هى منتظرة يروح في داهية الا انها لقيته متشعبط في حبال الدنيا و مش راضي يفارق امها !!
و لهف الزبدية و لا كانها فيها شىء و اخذ جلسته و روح على البيت
ليبدأ التنفيذ و على الله تكون التحويجة عملت مفعولها المتين !!

لكن واضح ان خلاص عزرائيل شرف و حضر

والواد نهايته قربت

راح لها العبيط تاني يوم يشتكي ان التحويجة ما عملتش حاجة؟

فقالت له طيب ولا يهمك اروح للست اخذ منها تحويجة اقوى
والتقي بيك الساعة 6 ؟؟

و روح و نزلت هى اشترت لك سم فئران اصيل؟
من عند العطار اللي جنب البيت
وجاء الواد و معاه عزرائيل
دخل و جلس و عملت له اليوم فنجان قهوة خطير
شرب الواد القهوة
.
.
.

وخلال ربع ساعة كان بدأ يفرفر و رغاوي الفم تخرج منه !!
و يصرخ و يقول
عملتوا فيا ايه ؟ >>> لما أفتكر !!

تقولوا خلاص قول على نفسك يا رحمن يا رحيم ؟

فضل يصرخ و لا حد هنا و تقوله
لا تحاول مافيش صريخ ابن يومين حيسمع لك او يحاول يساعدك

واتسحب الواد من رجليه على الارض على الغرفة الداخلية و شاف امامه عيال اعمام و خلان القتيل صحبه
بيسلموا على اخته و يقولوا لها احنا منتظرين تحت في العربية
وفي انتظار البشارة؟

جريت البت اخت منال ندت عليها من بيت زوجها
وما نسيتش كمان تروح تجيب مرات القتيل و بنته الصغيره
وكمان تقول لاخته الثانية اللي كانت هى كمان مش موجودة لانها متزوجة
جاء الكل و منهم منال و دخلت شافت الواد في خبر كان

و هنا اصل المصيبة و النيله
لانها لما شافته صعب عليها في الاول
وجرت على امها تتوسل لها تعتق الواد
يا امه حرام عليك سيبي الواد حرام حيموت

ترد تقول لها :
ايه يعني ما دة المطلوب؟
اسكتي انتي مش حاسة بحرقة قلبي على اخويا المقتول؟
ما يحسش بالنار الا اللي اتكوى منها

وهى تبكي و مش قادرة تتحمل منظر المسكين المتسمم المرمي على الارضية
وتقول
انها كانت بتفكر تعمل ايه
يعني اروح و اجري اقول للناس الحقوا
ما امي حتروح في داهية؟

و الواد يقول لها الله يخليك وديني على المستشفى
انا معايا فلوس في جيبي بس وصليني لها و فارقي؟

وهى تبكي و تبكي
لكن للاسف ما استمرش الوضع على الخوف و الفزع و ضميرها اليقظ
لانها بعدين افتكرت منظر خالها و شكلة و آلامه اللي كان بيعاني منها قبل موته
فقالت له
" شفت انتى السبب في اللي حصل لك قتلت خالي المسكين الغلبان اللي مالحقش يفرح بقدوم ابنة و لا حتى بزواجه الجديد
فتستاهل اللي عملته فيه اتعمل فيك
واهي حطت لك سم انت كمان في القهوة اللي شربتها؟

تخيلوا معي بقى منظر الواد وقتها!!
و جاءت مرات القتيل عشان تتشفى في الواد و جابت معاها بنتها الصغيره عشان تشوف هى كمان
اما اخته الكبيرة ففضلت تصرخ و تقول
حرام عليكم حتروحوا من ربنا فين
يا مجرمين يا سفاحين
و تبكي و تصوت و تقول انا بريئة يا رب من اللي حصل

والبت منال تقولي اصل خالتي دي متدينة حبتين !!

لحد ما الواد القاتل بقى قتيل وودع حياته
ونزلوه من الشقه عشان يرموه في حته مداريه و نائية
ويكملوا نفس السيناريو اللي عمله هو من قبل في اخوهم القتيل!
و بكدة يكونوا اخذوا حقهم ثالث و متلت
وارتاحوا !!

اهل الواد دوروا عليه و لاقوه مرمي ميت و منتهي
والغريبة انهم عرفوا انه مات مقتول بالسم
مثل ما عمل هو في الواد الاولاني

و كتموا على الموضوع و لا من شاف و لا من دري
و الاغرب ان كل المنطقة كانت عارفه مين السبب في موت الثاني
وماحدش اتنفس بكلمة و لا قال حاجة !!
.
.
.
طيب انا بقى اعمل ايه بعد ما سمعت القصة؟
حاطة في بيتي ريا بنت سكينة و مش عارفه اعمل ايه في المصيبة اللي ماكانت على بالي و لا خاطري؟
طبعا جلست اقول لها بس حرام كدة و امك لو البوليس كان وصل لها كانت اخذت اعدام مشفي
واقل شىء لو رافوا بها يعطوها 25 سنة حلويين
وهى ايه عرفها ان قتل اخوها مش مصلحة له
وربنا قدر له يموت كدة فخلاص
ثم هو مات مقتول على سجادة الصلاة
دة كان سكير و ربنا يبشبش الطوبة اللي على راسه !!
اما امك دي فحسابها عند ربنا كبير
واكيد ربنا حيبلاها باللي يخلص عليها
وكما تدين تدان
وعليها سؤال شيخ ثقة
في حكم قتل حد بدافع الثار
عشان لو حرام يبقى تستغفر ربها
وتحمده انه نجدها من حبل المشنقه !!

فخافت مني و سكتت و بطلت كلام

بس بعد ايه بعد ما خلتني في خبر كان !!
قلت لزوجي قال بلطف و حنيه اتعاملي معاها؟
واياك من مضايقتها لتبلغ امها عنا و تقوم بالواجب معنا ؟
وانا مش مستغني عن عمري لو كان عندك انتي رغبة تانية !!

و اقول لصحباتي يقولوا :
انتي منتظرة ايه لما تخلص عليك ؟
و ايه يا هبله اللي بتقوليه دة لها انتي حتعملي مصلح اجتماعي عليها هى التانية مش كفاية احنا !
دي لا تتكملي معاها خالص
لتخاف منك تروح تقول لامها
تيجي تخلص عليك
وهى عارفه مواعيد خروج زوجك و اولادك بره البيت !!

فرعبوني اكثر !!!
و لحد الان مش لاقية شىء اقدر منه امشيها و اخلص منها
ما هى مثل ما قلت لقيه !!

و دي نهاية قصة خدامتي مع الواد القتيل
ومش عارفه لحد اللحظة دي اعمل فيها ايه ؟؟

متربية آه ,, معقده لا
جبانة ؟؟ طبعا اكيد !!

Wednesday, February 13, 2008

مالكم و مال الناس ؟؟



لا متروحوش لبعيد ,, انا مش بغني اغنية يا حاسدين الناس ؟؟
الناس اللي بتكلم عليهم غير المحسودين خالص
.
.
.

اللي بتكلم عليه
هو التفكير الدائم في الناس و ربطهم بكل شىء في حياتنا

بنخاف من البُعد عن الناس؟
بنخاف من منظرنا بين الناس؟
بنخاف من كلام الناس؟
بنخاف احسن ياخذوا فكرة عنا و حشة او مش اللي هيا ؟؟
بنخاف من عين الناس ؟ على موجة الاغنية ؟؟

عمالين نفكر فيهم و نعطيهم اهمية و اولوية كبيرة في حياتنا
ونسينا اهم شىء

ان الاولى اننا نفكر فيه و نعمل له الف حساب
بل مليون حساب

هو رب العالمين

تاملوا معايا كدة ؟


آيه كريمة :

وتخشى الناس والله أحق أن تخشاه}}

تعرفوا ؟؟

لو كل واحد فكر فيما يرضي الله حنرتاح من كل همومنا ؟ :-
لو فكرت ترضي ربنا عشان يحبك ,, حتحبك الناس
لو فكرت تنظف نفسك و تستحمى عشان دينك قال النظافة من الايمان ,, حتشوفك الناس دائما بشكل نظيف و تفرح بريحتك الحلوة !
لو فكرت انك تتقن عملك اخلاصاً لله عز و جل ,, حتلاقي المناصب و الترقيات و البونسات نازلة ترف فوق راسك
لو فكرت انك تزكي من اموالك المتلتلة تحت البلاطة و تساعد الفقراء و المساكين مش حتلاقي حد يبص لك في رزقك و مالك و حتبطل تقول ,, الناس مش سيباني في حالي ارحموني !
لو فكرت تعامل مراتك بما يرضي الله و تعاملي جوزك بالمثل ,, حتفضلوا ازواج سعداء الى الابد ان شاء الله
لو فكرت تعامل الناس بادب و احترام ارضاءاً لله اللي امر المسلم بانه يكون قدوة باخلاقه القويمة ,, عمر ما حد حيطول لسانه عليك و لا على غيرك لان الكل حيكون متربي و ابن ناس !!
لو فكرت ترضي امك و ترحم والدك ,, حتلاقي ربنا بارك لك في ذريتك من بعدك

يعني الخلاصة
لو علاقتك و علاقتِك بربك اللي خالقك صحيحة و صادقة
و نفذتوا اوامره و ابتعدتوا عن نواهيه
تاكدوا انه حيسخر لكم الناس و حيحفظكم من شر الناس و كمان الوسواس الخناس
كلامي و فكرتي صح و لا ......!!

وربنا يكفينا الناس و لا يحوجنا الا له
متربية آه ,, معقده لا

يوميات خادمة قاتلة2

تعالي يا منال الله يخليك اكنسي تحتي بالمكنسة

حاضر ( حضر لك الخير يا حبيبتي الحمد لله لقيه من السما

و راحت منال تجيب المكنسة و انا شغاله تك تك تك على الكي بورد

و جات منال و بدات تكنس و طول ما هى شغاله كنس تخبط في الكرسي بتاعي و انا مشكلتي اني بيصيبني دوخة من الرج و الهز في فقمت من مكاني اترك لها فرصة تنظف بسرعة و اخلص

و معلش يا منال اصلي ماعنديش وقت و على طول جالسة امام النت ؟

منال ردت " اه ما انا عارفاه ( تقصد الكمبيوتر ) اصل واحد جارنا عنده واحد زيه و طول النهار قاعد يلعب عليه !! و ولادي بينزلوا يلعبوا كمان عليه و هو الله يسامحة مرة عرف ان العيال مش بتصلي فقال لهم تعالوا اوريكم اللي مش بيصلي بيعملوا فيه ايه ,, و فتح لهم صورة شاب في تربته و كان شكلة اسود و محروق خالص العيال اترعبت و ماعرفتش تنام 3 ليالي من الخضه ؟"

انا : حسبنا الله و نعم الوكيل فيه ليه يعمل كدة في الاولاد ؟كويس انه يوجههم اه لضرورة الصلاة لكن لا يصرعهم ؟

ترد تقول " و هى صرعتهم لوحدهم الله يقطعه ما انا كمان خفت ؟ لما جوم يحكوا لي و نزلت لمراته قلت لها ايه حكاية الواد المحروق و فتحوا البتاع دة وورتني الصورة ؟"

قلت لها " يا بنتي دة موضوع معمول كذب على النت عشان يرهبوا به الناس دقيقة اوريكِ الصورة عشان تصدقي "

و عملت فيها المرشدة و فتحت لها الصورة و قلت لها مش هى دي ؟

قالت " اه هى "

قلت لها "

دي ملفقه و هى اصلا مش لواحد تارك الصلاة دي لواحد افريقي باين اتحرق في حادثة !

ومش كل حاجة تتشاف على المخروب دة تتصدق

انا قلت اقول لك عشان تبقي واعية و لا يضحك عليك حد

و كملت منال الكنس قفلت و بصت لي و قالت

اصل انا جسمي بقى ملبش خالص و مش متحمل ؟

ليه يا ينت الحلال ما قلت لك الموضوع مضروب و مش صح ؟

لا يا مدام اصل انا كان لي خال مات من 10 سنين و مات صغير عنده 24 سنة

اه الله يرحمه ؟ كان عيان يا منال ؟

لا اصلوا مات مقتول

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مقتول ازاي يا شبه ؟


صحبه سممه في قاعدة انس و قتله ؟

والله ؟؟؟ و طبعاً اتعدلت على الكرسي و تركت النت و نت ايه الان
خلينا في القصة المنيله دي

ورديت عليها :

؟ليه ايه اللي حصل

اصل خالي اشترى منه مروحة من اللي بتتعلق في السقف كان جايبها من ليبيا بـ50 جنية ؟؟؟

طبعا في سري قلت " يا بلاش الله يرحم زمان و ليالي زمان و حاجات ليبيا ؟؟ "

آه و بعدين كملي ؟

و بعدين الواد جابها له و خالي دفع 35 جنية و الباقي قاله حسددهم بعدين ؟

فالواد لما خالي اتاخر عليه راح له البيت و كان مش موجود ؟ و فتحت له مراته ( اصلوا كان متزوج جديد و عندة بنت عمرها كم شهر ) المهم لما راح لخالي و مراته لوحدها راح داخل البيت و طلع على الطرابيزة و فك المروحة ؟ في دخلة خالي عليه ؟ راح ماسكة لفحه قلم على وشه و اتخانق معاه ؟"

اه طبعا له حق الراجل سيد الرجالة دة ازاي الواد قليل الادب يقتحم البيت و يدخل و مراة خالك لوحدها طبعا تصرفه اقل شىء ؟

آه يا مدام ما هو تصرفه دة خلى الواد لا ينسى القلم الملفوح على خلقته و اتربص به لحد ما كانوا معزومين في فرح و بيشربوا بيره مع بعض و راح حاطت له سم في البيره بعد نصف ساعة فرفر منهم راحوا شايلينه و رموا في حته ظلام عندنا في حلوان و لاقيناه ورحنا المستشفى قال الدكتور خالكم اتسمم و احتمال يموت "

طيب عالجه يا دكتور اهم شىء يعيش ( دة اخوه الثاني اللي بيقول )

فقال له علاجة حيبقى غالي عليكم و محتاج حقنة بـ60 جنية كل يوم ؟

ماشي 60 جنية بس يعيش ؟

و فضل الواد 10 ايام في الدمرداش لحد ما مات من تاثير السم ؟

و قام العزاء و جاء اهل الميت من ناحية امه اللي هما من الصعيد

لما دخلوا يعزوا و يسألوا مات ازاي
الولد الثاني قال لهم مات و خلاص ( واضح انه عارف عمايلهم السودا ؟)

راحت امها قالت يالهوووووووووووووووووووووووووي اخويا مات مقتول ؟


مقتول ؟ مقتول كيف يا حرمه ؟

فحكت لهم القصة

و طبعا الثار و لا العار يا حمدان

وبدات القصة المنيلة ؟؟

و استئذن الله و لي عودة
و الله المستعان ؟

Tuesday, February 12, 2008

يوميات خادمة قاتلة

حكايتي مع الخادمات
هى حكاية من الف ليلة و ليلة
اغلبنا عاشها و مازال ؟
البحث عن خدامة امينة و بنت ناس
تصون العيش و الملح
وتخدم اهل البيت بعيونها
زمان و كان يا ماكان كانت الخدامة تدخل البيت لا تخرج منه الا على بيت عدلها
ويمكن يكافئوها و يزوجوها من السفرجي و لا السواق
ويعملوا لهم غرفة صغيرة في الجنينه و تعيش فيها هى و زوجها
ويخلفوا فيها صبيان و بنات
و يشتغلوا الصبيان و البنات برضه في البيت
اللي كرمهم و صانهم و سترهم كمان !
لكن الان الله يحفظنا
لو لقيت واحدة بنت حلال و ارتحت لها تطلع مقلب
ولو جبت واحدة تبع واحدة صحبتي تطلع مصيبة و تسبب في مقاطعة بيني و هذة الصديقة
ولو جبتها من مكتب تبع اعلانات الجرايد و المجلات النصب اشوفها و اتفق مع مندوبة المكتب
تاني يوم لا تاتي
ويضيع عليا الشهر المقدم العمولة اللي دفعته على قفا ان فلانه حتيجي بكرة في الميعاد
و الغريبة ان الافلام دي كلها لا اراها الا في المحروسة
وكل بلد زرتها كانت امور الخادمات فيها ميسرة
وتفضل معي سنة و اثنين
وتبكي كمان و هى مفارقة
بعد ما اكون عبيت شنطتها بالهداية لها و لاولادها
ودة حصل مع الخادمة الاندونسية
وبالرغم من مشاكلها و حركاتها القرعة بالبحث عن الضالة و لا احد يسالني ايه هى الضالة دي؟
اللي عنده خادمات من آسيا حيفهم ايه هى الضالة اللي كانت تبحث عنها !!
الا اني كنت مسيطرة عليها و مطمئنة لها
وبثق كمان فيها
لكن اللي لا اتصوره اني اجد في بيتي خدامه اجربها شهر اثنين تطلع و لا احلى
ثم اتحدث معاها و كلمة يمين كلمة شمال اتفاجىء انها و امها " سفاحيين "
ويا لهوتي يا خرابي!

تشوفوني و انا مفترية بقيت زي القطة الهادية
ابتسم لها و اتكلم معها من وقتها بحنيه
و هى مبسوطة و منتشيه و تحلف انها مش حتمشي ابدا
هى كل يوم ممكن تقع مع اسره حلوة مثلنا!!
انا بين نارين اعمل فيها ايه؟
امشيها و اخلص منها
ولا ابقى عليها و احضر كفني معاها؟طب و بعدين اعمل ايه؟
اطفشها و لا اسيبها؟
تابعوني في الجزء الثاني
احكي لكم نيلت ايه هى و امها و انتظر تحكموا انتم على الموضوع
و استأذن الان

اول خطوة ,, مبروك عليا

الحمد لله اتحقق حلمي

بالرغم من اني اكتب في المنتديات من 2005 الا اني قررت اليوم اعمل مدونه و اكتب فيها ؟
حتقولوا ليه خير اللهم اجعله خير؟
.
.
اقول لاني عايزة اعبر عن اللي في داخلي دون قيود , دون قوانين المنتديات , دون ان يعدل احد على موضوعاتي و يتحفني بالحذف او التنسيق ؟ عايزة اكتب بفكري , بطريقتي , بحريتي , بلهجتي ,, عايزة انقد , اتفلسف , اقول اعيد من غير تدخلااااااات !

فكرة المدونة موجودة من زمان و تشهد عليا صحبتي لينا الحلوة , كل ما اتخانق معها اقول لها و الله لاعمل مدونة و افضحكم فيها ؟ مش بس عليها و على جيكا كمان . و طبعا دة هزار مني لهم و هما عارفين اني بحبهم , و على فكرة دول اصحاب النت من اول ما بدات فيه كل واحدة منا في مدينة شكل انا في القاهرة و لينا في طنطا و جيكا في بورسعيد و كل واحدة منا لها عمر مختلف و شخصية مختلفة لكن متصاحبين و متحابين و ربنا ما يفرقنا عن بعض و يبعد عنا العين و الحقد خاصة ان صداقات الان اصبحت اغلبها فلصوا , مصلحة و طلبات و شوية تماحيك و مخططات للحصول على المراد !!
.
.
اسفة جداً اني دخلت شمال على طول
من غير لا احم و لا دستور
بس لا تنسوا يا قراء اني متربية آه ,, متعقدة لا !!
و مسيركم حتتاكدوا من دة بنفسكم
.
.
مرة تانية اقول اني مش عاملة البلوج الا عشان افضفض و اطلع اللي جوايا
و ابعد عن شغل المنتديات المنمق جداً
اخاف اتكلم يعطوني انذار
اخاف انقد يدوني استمارة 6 و بالسلامة على بره يا حلوة !!
.
.
من هنا اطلق يديا و اعلن حريتي
هنا صندوق اسراري , هنا درج مكتبي

الحمد لله فتحت مدونتي
كلامي
تعليقاتي
مش عشان اظهر و اتلمع ؟
لا عشان افضفض و اقول من غير تدخلاااات
نقدي عارفة ممكن يكون لاذع
لكن مش اسوأ من اللي بنعيشوا في دنيتنا
بيسموني صاحبة القلم الرصاص ؟
ليه يا بنتي انتي و هيا هو انا جندية اسرائيلية !!
لا دة انا بس عشان عندي ضمير نائح حبتين عليا
ومش بعرف اخبي مشاعري
واللي يضايقني او يزعلني او يجرح مشاعري او يتعب نظري
فوراً بنقض عليه
كنت زمان زي المدفع الرشاش
الان بقيت حنونه و عاقلة و مستكنه
انصح بهدوء و اضغط على اسناني لبعض الوقت
لكن هيهااااات مش لفترة طويلة
و ان شاء الله ابدا و ربنا يقدرني
.
.
ولا تنسوني من التشجيع و ان شاء الله تكون افتتاحية حلوة و راقية
ولا تنسوا انا متربية آه متعقدة لا ابدا والله
استئذن الان